17 ივლისს, იაპონიის დედაქალაქ ტოკიოში ზაფხულის XXXII ოლიმპიურ თამაშებზე გაემგზავრება საქართველოს ოლიმპიური დელეგაციის ყველაზე მრავალრიცხოვანი 30-კაციანი ჯგუფი - ტყვიის მსროლელები, ძიუდოისტები, ძალოსნები, მოკრივეები და სამედიცინო პერსონალი.

საქართველოს ოლიმპიური დელეგაციის სხვა წევრები გეგმა-გრაფიკის მიხედვით თამაშებზე ეტაპობრივად გაემგზავრებიან.

საქართველოს ოლიმპიურ დელეგაციას ზაფხულის XXXII ოლიმპიურ თამაშებზე სეოკ-ის პრეზიდენტი ლერი ხაბელოვი უხელმძღვანელებს.

ოლიმპიურ სოფელში მისიის ხელმძღვანელია სეოკ-ის პირველი ვიცე-პრეზიდენტი ელგუჯა ბერიშვილი.

იაპონია ზაფხულის XXXII ოლიმპიურ თამაშებს 23 ივლისიდან 8 აგვისტოს ჩათვლით უმასპინძლებს და მასში საქართველოდან სპორტის 11 სახეობაში 35 სპორტსმენი მიიღებს მონაწილეობას.

17 ივლისს საქართველოს ოლიმპიური დელეგაციის წევრები თბილისის საერთაშორისო აეროპორტში იქნებიან 19:00 საათიდან.