ელგუჯა ბერიშვილი

მუშაობდა გაზეთების - "ლელოს," "საქართველოს რესპუბლიკის," "სარბიელის" რედაქციებში, რადიო "თავისუფლებაში." 1991-2012 წლებში იყო საქართველოს სპორტულ ჟურნალისტთა ასოციაციის პრეზიდენტი, 1996 წლიდან - სპორტული პრესის საერთაშორისო ასოციაციის (AIPS) კოორდინატორი. აკრედიტებული იყო 8 ოლიმპიურ თამაშებზე, დელეგატის სტატუსით მონაწილეობდა სპორტული პრესის საერთაშორისო ასოციაციის (AIPS) 15 კონგრესში. 1997 წელს აირჩიეს AIPS-ის ევროპის კომისიის წევრად. 1999 წელს თავმჯდომარეობდა სარეფერენდუმო კომიტეტს, რომელმაც გამოავლინა საქართველოს XX საუკუნის საუკეთესო სპორტსმენები, გუნდები, მწვრთნელები და სპორტის მოღვაწეები.

იყო საქართველოს ოლიმპიური მისიის ხელმძღვანელი პირველ ევროპულ თამაშებზე (2015) და ზაფხულის XXXI ოლიმპიურ თამაშებზე (2016). ავტორია წიგნებისა -„დიდი ბურთაობა," „ფალავანთფალავანი," „გივი კარტოზია," „რომან რურუა," „ზურაბ ზვიადაური," „სპრინტის მეფე," „ოლიმპიური საქართველო," „დიდი ჩემპიონი," „ქართული სპორტის ოქროს წიგნი,"  „ქართველები რიოში." არის „ოლიმპიური ენციკლოპედიის," „სპორტის ენციკლოპედიის," „ქართული სპორტის ფოტოისტორიის," 36-წიგნიანი სერიის („ქართველი ოლიმპიური ჩემპიონები"), პროექტის ავტორი და მთავარი რედაქტორი. ღირსების ორდენის კავალერი.