ასეთი რამ პირველად ხდება საქართველოში!

2018 წლის 23 ივნისს თბილისში, რუსთაველის სახელობის სახელმწიფო თეატრში შეიკრიბება ყველა დროის (1952-2018 წლები) ქართველ ოლიმპიელთა ლაშქარი.

საქართველოს პირველი დემოკრატიული რესპუბლიკის 100 წლის იუბილე და საერთაშორისო ოლიმპიური დღის, 23 ივნისის დაწესების 70 წლისთავი - ეს ორი მნიშვნელოვანი თარიღი აერთიანებს ქართველ ოლიმპიელთა დიდ ფორუმს, რომელიც საქართველოს ეროვნული ოლიმპიური კომიტეტის თაოსნობით ეწყობა.

ფორუმზე ვიწვევთ ოლიმპიური თამაშების ჩემპიონებს და პრიზიორებს, სხვადასხვა თაობის ოლიმპიელებს, მათი ოჯახის წევრებს.

საპატიო სტუმრის სტატუსით ფორუმს დაესწრებიან  საერთაშორისო ოლიმპიური კომიტეტის, ევროპის ოლიმპიური კომიტეტების, ოლიმპიელთა მსოფლიო ასოციაციის ხელმძღვანელები.

ოლიმპიელთა ფორუმში მონაწილეობას მიიღებენ საქართველოს ხელისუფლების, დიპლომატიური მისიების წარმომადგენლები, ვეტერანი და ახალგაზრდა სპორტსმენები, მოსწავლეები და სტუდენტები, მეცნიერებისა და კულტურის მოღვაწენი, სპორტის გულშემატკივრები.

საქართველო წარმატებული სპორტული ქვეყანაა.

1952-2018 წლებში, საბჭოთა ეპოქაში და დამოუკიდებლობის პერიოდში, ზაფხულისა და ზამთრის 27 ოლიმპიურ თამაშებში საქართველოს  394-მა სპორტსმენმა იასპარეზა.

ჩვენს ოლიმპიელებს სპორტის 21 სახეობაში სულ მოპოვებული აქვთ 126 ოლიმპიური მედალი, მათ შორის - 39 ოქროს მედალი.

საქართველო ამაყობს თავისი სახელოვანი სპორტსმენებით, თითოეული ჩვენი ოლიმპიელით.

სწორედ მათთვის პატივის მისაგებად და ჩვენი სპორტის ოლიმპიური მიღწევების წარმოსაჩენად იმართება სრულიად საქართველოს ოლიმპიელთა ფორუმი.

ასთან ერთად, სწორედ 23 ივნისს, საერთაშორისო ოლიმპიურ დღეს,  მთელი ქვეყნის მასშტაბით მოეწყობა ოლიმპიური გარბენი და სხვა საინტერესო სპორტული შეჯიბრებები.

თბილისში, კუს ტბაზე ოლიმპიური გარბენი 11 საათზე დაიწყება. სხვებთან ერთად, სტარტზე დადგებიან ოლიმპიური თამაშების ჩემპიონები და პრიზიორები, სხვა ცნობილი სპორტსმენები.

შემოუერთდით სახელოვან ქართველ ოლიმპიელთა ლაშქარს!

საქართველოს ეროვნული ოლიმპიური კომიტეტი.