სეოკ-ის შტაბ-ბინაში 2018 წლის სპორტულ-შემეცნებითი ოლიმპიადის გამარჯვებულების დაჯილდოება გაიმართა

30 ოქტომბერი 2018

30 ოქტომბერს,  საქართველოს ეროვნულ ოლიმპიურ კომიტეტში გაიმართა სპორტულ-შემეცნებითი ოლიმპიადა 2018-ის გამარჯვებულის დაჯილდოების ცერემონია.

სპორტულ-შემეცნებითი თამაშები სასკოლო სპორტული ოლიმპიადის შემადგენელი ნაწილია, რომელსაც საქართველოს ბავშვთა და სასკოლო სპორტის ეროვნული ფედერაცია, საქართველოს განათლების, მეცნიერების, კულტურისა და სპორტის სამინისტროს დახმარებითა და საქართველოს ეროვნული ოლიმპიური კომიტეტის მხარდაჭერით, მთელი ქვეყნის მასშტაბით ატარებს.

საქართველოს ეროვნული ოლიმპიური კომიტეტის ჟიურის გადაწყვეტილებით, სპორტულ-შემეცნებითი ოლიმპიადა 2018-ის გამარჯვებული გახდა ქალაქ სენაკის N3 საჯარო სკოლის გუნდი, რომლებმაც საკონკურსო ნამუშევარი შექმნეს თემაზე „პარალიმპიური თამაშების ისტორია და პირველი ქართველი პარალიმპიელები".

მე-2 ადგილი ქუთაისის N40 საჯარო სკოლას, ხოლო მე-3 ადგილი ოზურგეთის მუნიციპალიტეტის სოფელ ბახვის საჯარო სკოლას ხვდა წილად.

გამარჯვებული გუნდის წევრები, ასევე პედაგოგები, დიპლომებით და სამახსოვრო საჩუქრებით დააჯილდოეს საქართველოს ეროვნული ოლიმპიური კომიტეტის პრეზიდენტმა ლერი ხაბელოვმა, პირველმა ვიცე-პრეზიდენტმა ელგუჯა ბერიშვილმა, ვიცე-პრეზიდენტმა ნინო სალუქვაძემ და საქართველოს ბავშვთა და სასკოლო სპორტის ეროვნული ფედერაციის გენერალურმა მდივანმა ლევან კიკალიშვილმა.

ღონისძიების დასასრულს სენაკელმა მოსწავლეებმა და პედაგოგებმა ოლიმპიური მუზეუმი დაათვალიერეს.