შეხვედრა განათლების, მეცნიერების, კულტურისა და სპორტის სამინისტროში

24 ოქტომბერი 2019

განათლების, მეცნიერების, კულტურისა და სპორტის მინისტრი მიხეილ ბატიაშვილი, მოადგილე შალვა გოგოლაძესთან ერთად, მსოფლიო ჩემპიონატიდან წარმატებით დაბრუნებულ საქართველოს ახალგაზრდული ნაკრების წევრებს სამინისტროში შეხვდა და ისტორიული გამარჯვება მიულოცა.

მაროკოს ქალაქ მარაკეშში გამართულ მსოფლიოს ახალგაზრდულ ჩემპიონატზე, ახალგაზრდა ქართველმა ძიუდოისტებმა ინდივიდუალურ შეჯიბრში 3 ოქროს, 1 ვერცხლისა და 1 ბრინჯაოს მედალი მოიპოვეს და მედლების რაოდენობით გუნდურ ჩათვლაში იაპონიის შემდეგ მეორე ადგილი დაიკავეს. გუნდურ ტურნირში ჩვენი გუნდი ბრინჯაოს პრიზიორი გახდა.

აღსანიშნავია, რომ პირველად ისტორიაში, ახალგაზრდებს შორის მსოფლიო ჩემპიონის ტიტული ეთერ ლიპარტელიანმა (-57 კგ) მოიპოვა და პირველი ქართველი მსოფლიო ჩემპიონი ქალი ძიუდოისტი გახდა. მსოფლიო ჩემპონის ტიტულს ვლადიმერ ახალკაცი (-81 კგ) და ლაშა ბექაური (-90 კგ) დაეფლნენ, ილია სულამანიძე (-100 კგ) ვერცხლის, ტატო გრიგალაშვილი (-81 კგ) კი ბრინჯაოს პრიზიორები გახდნენ.

მინისტრთან შეხვედრას ახალგაზრდული ნაკრების წევრებთან და მწვრთნელებთან ერთად, ძიუდოს ფედერაციის პრეზიდენტი გიორგი ათაბეგაშვილი, ეროვნული ოლიმპიური კომიტეტის პირველი ვიცე-პრეზიდენტი ელგუჯა ბერიშვილი და ვიცე-პრეზიდენტი მამუკა ხაბარელი დაესწრნენ.

შეხვედრაზე ახალგაზრდებთან ერთად იმყოფებოდნენ ვეტერანი ძიუდოისტებიც, რომლებმაც ასევე მარაკეშში გამართულ ვეტერანთა მსოფლიო ჩემპიონატზე მოიპოვეს წარმატება.

მსოფლიო ჩემპიონატი ახალგაზრდა ძიუდოისტთა შორის
მარაკეში, მაროკო

ოქრო - ეთერ ლიპარტელიანი (-57 კგ)
ოქრო - ვლადიმერ ახალკაცი (-81 კგ)
ოქრო - ლაშა ბექაური (-90 კგ)
ვერცხლი - ილია სულამანიძე (-100 კგ)
ბრინჯაო - ტატო გრიგალაშვილი (- 81 კგ)
ბრინჯაო - საქართველოს ნაკრები (გუნდური)