დოპინგთან ბრძოლის ახალი იარაღი დაინერგება არაუგვიანეს 2022 წლის ოლიმპიურ თამაშებამდე

06 ნოემბერი 2019

საერთაშორისო ოლიმპიური კომიტეტის პრეზიდენტის (IOC) თომას ბახის განცხადებით, დოპინგთან ბრძოლის ახალი მეთოდი - მშრალი სისხლის ანალიზი (DBS) უნდა დაინერგოს არაუგვიანეს 2022 წლის ოლიმპიური თამაშების დაწყებამდე, თუმცა გამორიცხული არ არის, რომ ის უკვე 2020 წლის თამაშებზეც გამოიყენონ.

პარტნიორებთან შეხვედრისას გადაწყდა, რომ DBS-ის მეთოდი განხორციელდეს არაუგვიანეს 2022 წლის პეკინის ზამთრის ოლიმპიურ თამაშებამდე. WADA-ს თანხმობის შემთხვევაში, შესაბამისი ტესტირება შესაძლოა უკვე 2020 წლის ტოკიოს ოლიმპიურ თამაშებზეც გამოიყენონ. ჩვენ გვინდა, რომ თაღლითებმა არსად და არასდროს არ იგრძნონ თავი მშვიდად" - კატოვიცეში მიმდინარე მსოფლიოს ანტისადოპინგო მეხუთე კონფერენციაზე განაცხადა IOC -ის პრეზიდენტმა.

მსოფლიოს ანტისადოპინგო სააგენტომ (WADA) ოქტომბერში საერთაშორისო ოლიმპიურ კომიტეტთან (IOC), ტესტირების საერთაშორისო სააგენტოსთან (ITA) და იაპონიის, აშშ-ის შვეიცარიის, ჩინეთის და ავსტრალიის ანტისადოპინგო სააგენტოებთან ხელი მოაწერა სისხლის ანალიზის ახლებური ტესტირების მეთოდის შემუშავება-დანერგვის სფეროში ურთიერთგაგების და თანამშრომლობის მემორანდუმს.

დოპინგთან ბრძოლის ახალი იარაღის - ეგრეთ წოდებული მშრალი სისხლის (DBS) ანტისადოპინგო ტესტირების უპირატესობათა შორის სახელდება სინჯისთვის ასაღები სისიხლის მცირე რაოდენობა, სინჯების აღების და ნიმუშების ტრანსპორტირების სიმარტივე, შესანახად ნაკლები სივრცე, პროცედურების სიიაფე. ამასთან, სინჯი მალე არ დეგრადირდება. ეს მეთოდი უფრო სპორტსმენთა დიდ რაოდენობას მოიცავს, რაც მეტი თაღლითის გამოვლენასაც შეუწყობს ხელს.