გიორგი გახარია: „ყველაფერს გავაკეთებთ იმისთვის, რომ ოლიმპიელებს შევუქმნათ იდეალურთან მიახლოებული პირობები ვარჯიშისთვის"

27 მაისი 2020

საქართველოს ეროვნული ოლიმპიური კომიტეტი აქტიურად მუშაობს იმისთვის, რომ განახლდეს პანდემიის გამო შეჩერებული სასწავლო-საწვრთნელი პროცესი და ჩვენი ქვეყნის ოლიმპიური გუნდის წევრებს და კანდიდატებს რაც შეიძლება სწრაფად მიეცეთ სრულფასოვანი ვარჯიშის შესაძლებლობა.

სეოკ-ის ამ ინიციატივას სრული მხარდაჭერა გამოუცხადა საქართველოს პრემიერ-მინისტრმა გიორგი გახარიამ, რომელიც  დღეს პარლამენტის პლენარულ სხდომაზე მოხსენებით წარსდგა. სეოკ-ის პრეზიდენტმა ლერი ხაბელოვმა სწორედ პარლამენტის ტრიბუნიდან მიმართა პრემიერს თხოვნით,  დადებითად გადაეწყვიტა ეს საკითხი.

გიორგი გახარიას პასუხი ასეთი იყო: „რაც გასაკეთებელია მთავრობის მხრიდან, რომ ჩვენს ოლიმპიელებს, იმ ადამიანებს, რომლებსაც აქვთ შესაძლებლობა ან უკვე მოპოვებული აქვთ  ოლიმპიური თამაშების საგზური, ჩვენ გავაკეთებთ ყველაფერს. ყველაფერს გავაკეთებთ იმისთვის, რომ ამ ხალხს შევუქმნათ იდეალურთან მიახლოებული პირობები, რომ ივარჯიშონ. ჯანდაცვის სამინისტრო ამ სპეციალურ რეკომენდაციებს და პროტოკოლებს მოამზადებს და განსაკუთრებით ოლიმპიელების ნაწილში, უახლოეს პერიოდში ჩვენ შევძლებთ, რომ ამ ხალხმა დაიწყოს ვარჯიშები და წვრთნები."