საქართველოს ბანკი და ოლიმპიური კომიტეტის პარტნიორობა კიდევ 5 წლით გაგრძელდა

10 სექტემბერი 2020

დღეს, საქართველოს ეროვნული ოლიმპიური კომიტეტის ეზოში საქართველოს ბანკს, საქართველოს ეროვნულ ოლიმპიურ და პარალიმპიურ კომიტეტეტებს შორის გაფორმდა თანამშრომლობის მემორანდუმი.

საქართველოს ბანკსა და ოლიმპიურ კომიტეტს, ასევე პარალიმპიურ კომიტეტს შორის თანამშრომლობა გრძელდება. მხარეებს შორის გაფორმებული მემორანდუმის თანახმად, პარტნიორობა კიდევ 5 წლით გაგრძელდება. თანამშრომლობის ფარგლებში საქართველოს ბანკი კომიტეტებს 2025 წლის ჩათვლით დაგეგმილ ყველა ღონისძიებასა თუ აქტივობაში გაუწევს მხარდაჭერას. შესაბამის ხელშეკრულებას ხელი უკვე მოეწერა.

პარტნიორობის მთავარი მიზანი ქართველი სპორტსმენების ხელშეწყობა, მათი საერთაშორისო ასპარეზზე მხარდაჭერა და ქომაგობაა. ბანკისა და კომიტეტების ურთიერთანამშრომლობა ხელს შეუწყობს ქართველი სპორტსმენების ცნობადობის ამაღლებას, ოლიმპიური თამაშების შესახებ ბევრი საინტერესო ინფორმაციის მიწოდებას და გავრცელებას, რადგან თითოეული სპორტსმენისთვის, რომელიც ემზადება ოლიმპიური თამაშებისთვის, მნიშვნელოვანია სწორედ საკუთარი ქვეყნისა და მოსახლეობის მხარდაჭერა.

საქართველოს ეროვნული და პარალიმპიური კომიტეტების პრეზიდენტებმა ლერი ხაბელოვმა და რატი იონათამიშვილმა მადლობა გადაუხადეს საქართველოს ბანკის გენერალურ დირექტორს არჩილ გაჩეჩილაძეს თანამშრომლობისთვის და ქართული სპორტის მხარდაჭერისთვის.

„მოხარული ვართ, რომ ჩვენს და ეროვნულ ოლიმპიურ კომიტეტს შორის მრავალწლიანი, წარმატებული თანამშრომლობა რძელდება. ჩვენთვის დიდი პატივია სწორედ იმ სპორტსმენების მხარდაჭერა, რომლებიც არ ჩერდებიან, დაუღალავად ემზადებიან და მოტივირებულები არიან, რათა საკუთარი ქვეყანა წარმოაჩინონ. თანამშრომლობა მნიშვნელოვნად შეუწყობს ხელს ქვეყნის მასშტაბით სპორტის პოპულარიზაციას და სპორტსმენებს სამომავლო განვითარების შესაძლებლობას მისცემს. მადლობა მინდა გადავუხადო თითოეულ მათგანს იმ წვლილისთვის, რაც სპორტის განვითარებაში შეიტანეს და არაერთი ჯილდოსთვის, რომელიც ჩვენი ქვეყნის სახელით მოიპოვეს. ჩვენ გვეამაყება ჩვენი ოლიმპიელების გულშემატკივრობა", - განაცხადა არჩილ გაჩეჩილაძემ, საქართველოს ბანკის გენერალურმა დირექტორმა.