ბელგრადში, თავისუფალი სტილით მოჭიდავეთა მსოფლიო ჩემპიონატზე, სადაც საქართველოს ნაკრები სრულად არის წარმოდგენილი, გენო პეტრიაშვილმა (125 კგ) და შოთა ფარტენაძემ (61 კგ) მედლები მოიპოვეს.

ოლიმპიური თამაშების ვერცხლის და ბრინჯაოს, მსოფლიო ჩემპიონატების 3 ოქროს, 1 ვერცხლის და 3 ბრინჯაოს, ევროპის ჩემპიონატების 2 ოქროს, 4 ვერცხლის და 3 ბრინჯაოს და ევროპული თამაშების ბრინჯაოს მედალოსანმა ქართველმა მძიმეწონოსანმა მედლების კოლექციას ვერცხლის მედალი შემატა.

ტიტულიანმა ფალავანმა პირველ შეხვედრაში კამბოჯელი მოწინააღმდეგე დაამარცხა (9-3), შემდეგ ნეიტრალური ქვეყნის წარმომადგენელი (6-5), პოლონელი (3-1) და ამერიკელი (8-6) მეტოქეები, მაგრამ ოქროს მედლისთვის შეხვედრაში ირანელ ამირ ზარესთან  უშანსოდ - 0-11 დამარცხდა.

აღსანიშნავია, რომ ბელგრადის მსოფლიო ჩემპიონატს ოლიმპიური თამაშებისთვის სალიცენზიო დატვირთვაც აქვს. პარიზი-2024-ის საგზურის მოსაპოვებლად ექვს ოლიმპიურ წონით კატეგორიაში - 57, 65, 74, 86, 97,125  საუკეთესო ხუთეულში შესვლა იყო საკმარისი. ასე რომ, მძიმე წონაში ოლიმპიური საგზური დაბევებულია.

ბრინჯაოს მედლით დაასრულა ასპარეზობა შოთა ფარტენაძემ, რომელმაც მესამე ადგილისთვის შეხვედრაში უკრაინელ ვალენტინ ბლიასეცკის აჯობა.