საქართველოს ნაკრები პარიზის პარალიმპურ თამაშებზე წარმატებულ სვლას აგრძელებს. ჩვენს გუნდს რიგით მეხუთე მედალი შემატა პარა ძიუდოისტმა ზურაბ ზურაბიანმა (J2 კატეგორია -60 კგ).

ქართველი პარა ძიუდოისტი ასპარეზობაში მეოთხედფინალიდან ჩაება. პირველ შეხვედრაში ვაზარით გაიმარჯვა ჩილელ იოჰან ჰერერასთან, მომდევნო შეხვედრაში კი ალჟირელი მეტოქის, იშაკ ულდკუიდერის სამი გაფრთხილების შედეგად გამოცხადდა გამარჯვებულად.

ზურაბიანი გადამწყვეტ შეხვედრაში უზბეკ შერზოდ ნამოზოვს დაუპირისპირდა, მაგრამ სამწუხაროდ, ვაზარით დამარცხდა და  ვერცხლის მედლით დაასრულა ასპარეზობა.

პარიზის პარალიმპური თამაშების პირველ დღეს პარა ტაეკვონდოში ბრინჯაოს მედალი მოიპოვა ანა ჯაფარიძემ, მესამე საშეჯიბრო დღეს ბირთვის კვრაში ჩემპიონობა იზეიმა გიგა ოჩხიკიძემ, მეექვსე საშეჯიბრო დღეს ბრინჯაოს დაეუფლა ეტლით მოფარიკავე ნინო თიბილაშვილი, ხოლო მეშვიდე დღეს ვერცხლის მედლით დაასრულა ასპარეზობა ტყვიის მსროლელმა ვლადიმერ ჭინჭარაულმა.