16 თებერვალს ბაკურიანში დაიხურა ევროპის ზამთრის XVII ახალგაზრდული ოლიმპიური ფესტივალი - ბაკურიანი-2025. შეჯიბრებები საქართველოს სამ ქალაქში - თბილისში, ბაკურიანსა და ბათუმში მიმდინარეობდა.

ოლიმპიურმა ფესტივალმა სტარტი 6 თებერვალს თბილისში ახლად აშენებულ, თანამედროვე სტანდარტების ყინულის არენაზე ჰოკეისტთა შეჯიბრებით აიღო, 9 თებერვალს კი ბაკურიანში გაიმართა საზეიმო გახსნის ოფიციალური ცერემონია.

ოლიმპიურ ფესტივალში მონაწილეობდა 45 ქვეყნის 1000 - მდე სპორტსმენი, სპორტის 8 სახეობაში.

საქართველოდან სპორტის 3 სახეობაში იასპარეზა 8 სპორტსმენმა. აღსანიშნავია, რომ პირველად საქართველოს ზამთრის ოლიმპიური ფესტივალების ისტორიაში, საქართველოს სახელით მოპოვებულია ოქროს მედალი: ფიგურული მოციგურავე ინგა გურგენიძე პირველი ქართველი სპორტსმენია, ვინც ევროპის ზამთრის ახალგაზრდულ ოლიმპიურ ფესტივალზე ოქროს მედლის მოპოვება შეძლო.

დახურვის ცერემონიაზე საქართველოს მედროშე იყო სამთო-მოთხილამურე ირაკლი ხერგიანი. აღსანიშნავია, რომ ხერგიანმა სლალომში 92 მონაწილეს შორის დაიკავა 26 ადგილი.

ბაკურიანში, ფესტივალის დახურვის ცერემონიის ფარგლებში, ევროპის ოლიმპიური კომიტეტების, საქართველოს ეროვნული ოლიმპიური კომიტეტის და ბაკურიანი-2025 -ის საორგანიზაციო კომიტეტის ხელმძღვანელებმა დააჯილდოვეს სამთო თხილამურობის, თხილამურებით რბოლის და ბიათლონის სხვადასხვა დისციპლინებში გამარჯვებულები.

ევროპის ოლიმპიური კომიტეტების პრეზიდენტმა სპიროს კაპრალოსმა, ეოკ-ის ვიცე- პრეზიდენმა დაინა გუდზივენიჩუტემ და ნოდარ ქუმარიტაშვილის მამამ, დავით ქუმარიტაშვილმა ფესტივალის საუკეთესო გოგონა და ვაჟ სპორტსმენებს ნოდარ ქუმარიტაშვილის სახელობის ჯილდოები გადასცეს. ჯილდოებისთვის ნოდარ ქუმარიტაშვილის სახელის მინიჭების გადაწყვეტილება ევროპის ოლიმპიური კომიტეტებმა საქართველოს ეროვნულ ოლიმპიურ კომიტეტთან და ბაკურიანი-2025 -ის საორგანიზაციო კომიტეტთან ერთად მიიღო.

დამსწრე საზოგადოებას მისასალმებელი სიტყვით მიმართეს ევროპის ოლიმპიური კომიტეტების პრეზიდენტმა სპიროს კაპრალოსმა და ბაკურიანი-2025 -ის საორგანიზაციო კომიტეტის თავმჯდომარემ მამუკა ხაბარელმა.

ბატონმა კაპრალოსმა მადლობა გადაუხადა საქართველოს ფესტივალის უმაღლეს დონეზე ორგანიზებისთვის.

ცერემონიის დასასრულს ევროპის ოლიმპიური კომიტეტების (EOC) პრეზიდენტმა სპიროს კაპრალოსმა EOC-ის დროშა გადასცა ბრაშოვის მერს ჯორჯ სკრიპკარუს. 2027 წელს სწორედ რუმინეთის ქალაქი ბრაშოვი უმასპინძლებს ზამთრის მომდევნო ახალგაზრდულ ოლიმპიურ ფესტივალს.

ტრადიციულად, მოისმინეს ევროპის ოლიმპიური კომიტეტების ჰიმნი, დაეშვა დროშა და ჩაქრა ოლიმპიური ცეცხლი.