21 მარტს თბილისის „ახალ სპორტის სასახლეში" ძიუდოში საერთაშორისო ტურნირის - თბილისის გრანდ-სლემის პირველ დღეს სპორტული ჟურნალისტის, მამუკა კვარაცხელიას, წიგნის - ,,სამასმეერთე" პრეზენტაცია გაიმართა, რომელიც ძიუდოში ორგზის ოლიმპიური ჩემპიონის, ლაშა ბექაურის შესახებ მოგვითხრობს.

მამუკა კვარაცხელიამ წიგნს სიმბოლური სათაური - "სამასმეერთე" დაარქვა, რადგან ლაშა ბექაური ხშირად იმეორებს, რომ ის 300 არაგველების შთამომავალია და მათ გზას აგრძელებს. ავტორის თქმით, წიგნი ავტობიოგრაფიულია და 6 თვეში მომზადდა.

წიგნის პრეზენტაციას დაესწრო, შეკრებილ საზოგადოებას მისალმებელი სიტყვით მიმართა და ორგზის ოლიმპიურ ჩემპიონს ლაშა ბექაურს ახალი წარმატებები უსურვა სეოკ-ის პრეზიდენტმა ლერი ხაბელოვმა.

ღონისძიებას ასევე ესწრებოდნენ საქართველოს ძიუდოს ეროვნული ფედერაციის პრეზიდენტი ლევან ნოზაძე, ლაშა ბექაურის ოჯახის წევრები, ახლობლები, გულშემატკივრები და მედიის წარმომადგენლები.