რუსეთის მთავრობამ ის პრემიალური თანხა დაასახელა, რომელსაც ლონდონის 2012 წლის ოლიმპიური თამაშების ჩემპიონებს გადასცემს.

ეს ამბავი ჩვენთვის დიდად საინტერესო არც იქნებოდა, რომ არა ერთი თვალსაჩინო სხვაობა: მაშინ, როცა რუსები თავიანთ ათლეტებს თითო ოქროს მედლისთვის 100 ათასს ევროს დაჰპირდნენ, საქართველოს პრეზიდენტი მიხეილ სააკაშვილი ლონდონის ოლიმპიადის ჩემპიონს 2 მილიონი ლარით დაასაჩუქრებს! შედარებისთვის ისიც ვთქვათ, რომ წინა, პეკინის 2008 წლის ოლიმპიადის შემდეგ საქართველოს პრეზიდენტმა ჩვენს ოლიმპიურ ჩემპიონებს ირაკლი ცირეკიძეს, რევაზ მინდორაშვილსა და მანუჩარ კვირკველიას მილიონ-მილიონი გადასცა, რუსებმა კი თავიანთი წარჩინებული სპორტსმენებისთვის პეკინის შემდეგ 100 ათასი გაიმეტეს.