რუსი კერლინგისტი ალექსანდრ კრუშელნიცკი, რომელიც პიონჩანგის ზამთრის ოლიმპიურ თამაშებზე მეუღლესთან -  ანასტასია ბრიზგალოვასთან  წყვილში ბრინჯაოს პრიზიორი გახდა, ანტისადოპინგო წესების დარღვევაშია ეჭვმიტანილი. რუსი სპორტსმენის დოპინგ-სინჯში მელდონიუმის კვალი აღმოაჩინეს. სპორტის საარბიტრაჟო სასამართლომ უკვე გამოაცხადა, რომ მსოფლიოს ანტისადოპინგო სააგენტოს (WADA) პირველადი დასკვნის საფუძველზე კრუშელნიცკის წინააღმდეგ საქმე აღძრა.

თუ დოპინგის გამოყენების ფაქტი საბოლოოდ დადასტურდება, რუსებს არა მარტო ბრინჯაოს მედლის დაბრუნება მოუწევთ, არამედ შესაძლოა კითხვის ნიშნის ქვეშ დადგეს რუსეთის ოლიმპიური კომიტეტისთვის დროებითი დისკვალიფიკაციის მოხსნის საკითხი, ასევე ისიც, შეძლებენ თუ არა რუსები ოლიმპიადის დახურვის ცერემონიალზე ეროვნული დროშით გამოსვლას.

ამ საკითხზე საერთაშორისო ოლიმპიური კომიტეტის (IOC) აღმასრულებელი საბჭო საბოლოო გადაწყვეტილებას 24 თებერვალს მიიღებს.

საერთაშორისო ოლიმპიური კომიტეტის კომუნიკაციის დირექტორის მარკ ადამსის განცხადებით, მომხდართან დაკავშირებით IOC დამოუკიდებელ გამოძიებას დაიწყებს: „ჩვენთვის ეს ყოველივე მეტად უსიამოვნოა. თუ ბრალდება დადასტურდა და სპორტსმენი მართლაც დაადანაშაულეს დოპინგის მიღებაში, ეს მეტად დასანანი იქნება."  

მარკ ადამსის თქმით,  გაივლიან თუ არა დახურვის ცერემონიალზე ეროვნული დროშით ოლიმპიელი ათლეტები რუსეთიდან, ეს საკითხი ჯერაც ღიაა: „რუს სპორტსმენებთან მიმართებით ნაჩქარევი გადაწყვეტილების მიღებას არ ვაპირებთ. დოპინგის სპეციალისტი არ ვარ, მაგრამ იმის გათვალისწინებით, თუ „ბ" სინჯშიც დადებითი პასუხი იქნება, ესე იგი, სადღაც შეცდომა იყო დაშვებული. ეს შემთხვევა მხოლოდ ერთ სპორტსმენს ეხება. ამიტომ გთხოვთ, რომ ყველა რუს სპორტსმენს ნუ გასვრით."

მელდონიუმი WADA-ს აკრძალულ ნივთიერებათა ნუსხაში 2016 წლის 1 იანვრიდანაა შეტანილი. იმავე წელს  300-მდე რუს სპორტსმენს მელდონიუმზე დადებითი პასუხი აღმოაჩნდა. მოგვიანებით WADA-მ ორგანიზმიდან ნივთიერების გამოსვლის ვადების შუალედური კვლევის შედეგები გამოაქვეყნა, ხელახალი შემოწმების შედეგად კი ბევრი რუსი და უცხოელი სპორტსმენი გამართლდა.

მსოფლიო ანტისადოპინგო სააგენტომ ასევე გადაწყვიტა, რომ თუ 2016 წლის 1 მარტამდე სპორტსმენის დოპინგ-სინჯის ერთ მილილიტრში მელდონიუმის შემცველობა ერთ მიკროგრამზე ნაკლებია, ის დასაშვებად იყოს მიჩნეული.