ნორვეგიელმა მოთხილამურე მარიტ ბიორგენმა თანაგუნდელ მაიკენ ფალასთან ერთად პიონჩანგის ზამთრის ოლიმპიური თამაშების გუნდურ სპრინტში ბრინჯაოს მედლის მოპოვებით საკუთარი მონაგარი 14 ოლიმპიურ მედლამდე გაზარდა. ბიორგენმა ზამთრის ოლიმპიადებზე მოპოვებული მედლების რაოდენობით თანამემამულე ულე-ეინარ ბიორნდალენის რეკორდი გააუმჯობესა.

37 წლის ნორვეგიელის ოლიმპიური მონაგარი 7 ოქროს, 4 ვერცხლსა და 3 ბრინჯაოს მედალს ითვლის. მედლების საერთო მაჩვენებლით მარიტ ბიორგენი ბიორნდალენთან დაწინაურდა, მაგრამ უმაღლესი სინჯის მედლებით კვლავაც ჩამორჩება სახელოვან თანამემამულეებს _ ბიორნდალენსა და ბიორნ დელის, რომელთა საჩემპიონო ყულაბაშიც ერთით მეტი უმაღლესი ჯილდოა.   

აღსანიშნავია, რომ მარიტ ბიორგენის ოლიმპიურ ჯილდოებს შორისაა ვანკუვერის (2010) სამი და სოჭის (2014) თამაშების ამდენივე უმაღლესი სინჯის მედალი, ასევე სოლტ ლეიკ სიტის (2002), ტურინისა (2006) და ვანკუვერის სამი ვერცხლისა და ერთი ბრინჯაოს მედალი, ხოლო მისი პიონჩანგური ნადავლი თითო-თითო ოქრო-ვერცხლსა და ორ ბრინჯაოს მედალს ითვლის.