10 ივნისს დიღომში „ოლიმპიური პარკი" გაიხსნა. კომპლექსი, რომელშიც ევროპის ახალგაზრდული ოლიმპიური ფესტივალის, „თბილისი 2015"-ის შეჯიბრებები გაიმართება ოთხი სარბიელისგან შედგება. ესენია: ტანვარჯიშისა და ფრენბურთის დარბაზები, მძლეოსნობის არენა და საცურაო აუზი. „ოლიმპიური პარკის" გახსნაში მონაწილეობდნენ საქართველოს პრემიერ-მინისტრი ირაკლი ღარიბაშვილი, სპორტისა და ახალგაზრდულ საქმეთა მინისტრი ტარიელ ხეჩიკაშვილი, თბილისის მერი დავით ნარმანია, საქართველოს ეროვნული ოლიმპიური კომიტეტის პრეზიდენტი ლერი ხაბელოვი, „თბილისი 2015"-ის საორგანიზაციო კომიტეტის თავმჯდომარე ალექსი ახვლედიანი, სპორტის სამინისტროს, ოლიმპიური კომიტეტისა და სხვა უწყებათა წარმომადგენლები.

პარკის ცენტრში, აგრეთვე გაიხსნა მოქანდაკე ლევან ვარდოსანიძის სკულპტურულ-მონუმენტური კომპლექსი „ოლიმპიური ალი".
„თბილისი ევროპის ორმოცდაათამდე ქვეყნის ოთხი ათას სპორტსმენს უმასპინძლებს და ევროპული სპორტის დედაქალაქად იქცევა. ჩვენკენ იქნება მოპყრობილი მთელი მთელი სპორტული სამყაროს ყურადღება, - თქვა ირაკლი ღარიბაშვილმა და დასძინა, - ერთ სივრცეში მოქცეული სპორტული არენები ქართველ და უცხოელ სპორტსმენებს სრულფასოვანი მზადების საშუალებას მისცემს. კომპლექსი სრულად პასუხობს თანამედროვე სტანდარტებს და მაქსიმალურ კომფორტს უქმნის როგორც „თბილისი 2015"-ის მონაწილეებს, ასევე იმ სპორტსმენებს, რომლებიც მომავალში ჩვენს დედაქალაქში გაივლიან შეკრებებს".